О витязе и о смерти

(Из Рукописи XVII века.)

Некий человек воин оудалой, ежа по полю по чистому, и по раздолью широкому, прииде к нему смерть, и бе видение ея яко лев, ревнуя всячески, страшна от человеческаго оустроения, носящи оу себе оружия всякое мечи, и ножи, и рожни, и серьпы, и сечива, и оскорды, и иная многая незнаемая кознодейства различная образы. Сияже велми смиреная душа и оустрашися вельми изревнова же ей: кто ты еси лютая и зверь образ твой страшен велми, хожение твое о тебе звериное, а подобие человеческое? И рече ему смерть: пришла есмь, хощу взяти! И рече человек той: аз не хощу, а тебя не боюся. Рече ему смерть человече, чим мя не боишися? цари и князи и воеводы боятся, и святители, аз есм славна на земли, а ты мене не хощеши боятися. Рече же человек той: аз есмь оудалец, в ратних делех многи полки побивал, а от единых человек никтоже может братися, и напротиву стати, а ты ко мне едина пришла еси, а оружия и запасы носиши; видится мне, что есть не удала, толко есть страшна, образ твой страшит мя, и оуды во мне трепещут, на тебя смотря, и отъиди прочее, доколе тя не ссеку мечем моим. И рече ему смерть: аз есмь не сильна, и не хороша, и некрасна, да сильных и красных, от Адама и до сего дни, сколько было царей, и князей, и владык, и жен, и девиц, то всех аз собрала. Самсон силный, не богатырь-ли был, тако говорил: аще было кольцо в земли зделано, и аз бы всим светом поворотил; да и того взяла! Александр Македонский и оудалой и храбр и всей подсолнечной царь и государь был; да и того аз взяла! О человече! не мудрее ли тя царский Соломона? Царь Соломон хитр и мудр, да и тот со мною не смел говорить. Акир премудрый во ельлинском царствии не было такова мудреца, ни под солнцем, да и тот со мною несмел говорить, да и того аз взяла! Господь наш Иисус Христос, и той мя изволи вкусити, горькие смерти! Да ведомо человече тебе: аз есмь смерть не посулница, ни богатьства не собираю, ни красна, ни хороша не ношу, аз земныя славы нехощу. Занеже есмь не милостива и с детска неповадилася миловати, аз не милую, ни варовлю ни в чем ни часа. Как пришед, так возму. И рече человек той: госпоже моя смерть, яви на мне любовь свою. Рече же ему смерть: никако же, человече, занеже до миру моя любовь равна есть, какова до царя, такова и до князя, и до нища, и до святителя; аще бы богатства собрала, столко было бы оу мене богатфства бесчисленно всего много, несказанно, царств и земель, занеже, человече, аз яко тать живот возму. Рече: госпоже моя смерть, пожди мало, да покаюся. И рече ему смерть: понеже, человече, Бог глагола вам святыми книгами: бдите и молитеся, на всяк день и час, вам смерть ни грамоты не посылает, ни вести не подаст, но приидет аки тать, и слышал еси, человече, во святом евангелии Господь рече: братие, бдитеся, будите готова, и аще бы человек ведал, в кий день или в кий час тать будет, и он бы в ту нощь бдел и стрегл бояся крепка, не дал бы подкапывати храмины своея; тако мене горкия смерти кто ведал пришествие мене, и он бы крепко того часа ждал, и боялся и готовилъся. Живот рече: оувы мне в великих семи нуждах! О смерть! пощади мя до утра, да дела своя исправлю, исполняюся. И рече смерть: безумныи вы человецы, тем вы, человецы, себе прельщаетеся, и ко иным я такоже преступаю, иные се такоже молятся, и покаяния просят; Бог повелит ми ослабити, и егда оздравиет, и забудет мене, и оучнет жити яко безсмертен, и добрых дел не творит, а ныне ты глаголеши, яко оутру покаюся; да техже оузаоутриев много есть, а бес покаяния, но и паче согрешаете, ко и ныне аз приидох, не пожду, ни пощажу ни единаго часа, но было вам время каятися, но вы пребываете в лености, и в жестосердии, нищих не милуете, но мняще на сем свете бес конца жити, но гордостию распаляем на мя, и хощете со мною братися. Живот рече: се оуже видя, душе моя, и оустрашися зело. И рече же ей человек той: госпоже моя смерть, отпусти мя во град, и аз шед куплю себе срачицу и саван и милостыню сотворю, к нищим и раздам живот свой по себе по церквам, да священники творят службы над ним: богатство свое оставлю. Рече ему смерть: нпкако не отступлю от тебе, человече, коли еси ты был здоров, и ты о души своей непекася, и милостыни не творил от своего богатества своими руками. А нынеча своим животом не волен останется немилому другу; а труждалъся еси даром напрасно весь, а дети твои и жена твоя оскротают и от них пользи несть; добро человеку своими руками давати милостыня и сороковустия по души своей. И рече человек той: ох, ох! И начат плакатися, и рыдати горко, и вопети горше: ох злодею смерть! пришел еси по меня посол немилостивый, и никому от тебе не избыть! И приступи к нему смерть и за хвати за шею серпом, и претре ему пилою сердце на пол, и потом малым оскордецем, и посече ему ногн его, потом руце, таже теслою главу ему отсече, и разрушив вся составы его. Темже и разумейте, человецы вы, и егда человек болит и не оучнет владети собою, и оуды раздробит, а как оувидит больный человек смерть, и от страха забудет, и язык его оумолкнет, и очи остеклеют; тогда видит смерть, Ангела Божия видит и грехи своя что на сем свете согрешил, то все беси ему покажут, и родню свою видит, и сыновы, и дочеры, и жену свою, круг его стоят, над ним плачются; говорит к ним не может от страха, видя грехи своя. Тогда смерть наливает чашу горкую и вольет человеку в рот и в той горести душа из человека изыдет пред всеми, душу праведную ангелы Божии несут в рай, а грешную душу несут беси в муку; понеже сама оуготова. Добро человеку всякому каятяся трижды на год, и милостыня творити и (в) церкви ходити. Братие, блюдетеся смерти сии язык наш кроток, а тамо бес конца, а смерть никогожо минет, всей поведает без милостива. Богу нашему слава и ныне и присно и во веки веком. Аминь.